АН сүүлийн гурван удаагийн сонгуулиар үнэмлэхүй ялагдал хүлээсэн. Үүний гол буруутан нь Ардчилсан намынхан өөрсдөө. Тус намын дотоод зөрчил яван явсаар намаа хоёр хувааж, үнэмлэхүй ялагдал хүлээх гол шалтгаан болсон билээ.
Тиймээс УИХ-ын гишүүн Б.Пүрэвдорж, УИХ-ын гишүүн асан Х.Тэмүүжин, З.Нарантуяа нар Ардчилсан намын Онц их хурал зарлаж, эв нэгдлээ хангах 100 мянган гишүүний гарын үсэг цуглуулах санаачлага гаргаж буй талаар өнөөдөр /2021.06.14/мэдээлэл хийлээ.
УИХ-ын гишүүн Б.Пүрэвдорж: Энэ удаагийн Ерөнхийлөгчийн ээлжит сонгуулиар АН 1990 оноос хойш хамгийн бага санал авлаа. Тиймээс талцаад буй намыг нэгтгэхгүй бол цаашид ч улс төрийн хамгийн бага үзүүлэлттэй байх болно гэдгийг гишүүд дэмжигчид хэлж байгаа. Улсын дээд шүүх намын дотоод эв нэгдлээ хангах хэрэгтэй гэсэн шалтгаанаар АН-ын бичиг баримтуудыг буцаасаар байгаа. Тиймээс АН-ын дотоод эв нэгдлийг хангах, намын удирдлагуудыг нэгтгэх үүднээс 100 мянган гишүүний гарын үсэг цуглуулах аяныг эхлүүлж байна. Ингээд маргалдагч талуудыг аль алийг нь оролцуулж, нэг удирдлагатай болгох нь намын ирээдүйд туйлын чухал.
УИХ-ын гишүүн асан Х.Тэмүүжин: Ардчилсан нам дотроо хоёр хуваагдаж, нэг нэгэндээ дэгээ тавихаас илүүтэй хамтарч, нэгдэж урагшаа алхах цаг болсон. Ардчилсан намгүй сонгууль, ардчилсан хүчингүй өрнөж буй үйл явцын хохирогч нь иргэд болж байна. Тамганы булан барьж булаацалдаж байгаа хүмүүс гишүүдээ хонь адил хашаанд хашиж байгаа бол энэ нам эзэнгүй болно гэсэн үг. Тийм учраас өөр хооронд босгосон хашаа хороогоо хурааж, гишүүддээ хүч өгдөг итгэл үнэмшилтэй нам болох цаг болсон байна. Энэ намд хүмүүс итгэдэг байсан. Гэтэл тэр итгэлийг өөр хоорондоо талцсан байдал эвдэж байна. Иймээс АН-ын гишүүд бид эв нэгдлийг сэргээх зорилгоор мянга мянган гишүүдийн гарын үсгийг цуглуулж байна. Ардын намаар Ардчилсан намын хувь заяаг шийдүүлэхгүй.