Үндэсний сагсан бөмбөгийн холбооны шинэ улирал эхлээд байна. Багууд ойролцоогоор 10 орчим тоглолт хийгээд байгаа юм.
Өнгөрсөн улирлын аварга Лос Анжелес Клипперс болон лигийн шилдэг баг Милауки бакс багуудын тоглолт дэлхийн нийтийн анхаарлын төвд боллоо. Анхаарал татсан учир нь өнгөрсөн улиралд Торонто репторсыг чирч аварга болгосон Кавай Леонард энэ цагийн шилдэг сагсан бөмбөгч “Грек мангас” Яннис Антетекумпо нарын тулаан байв. Өнөө цагийн шилдгүүдийн өрсөлдөөнийг сонирхохоор 20 мянган фанат ордонд цуглажээ. Гэсэн ч Кавай Леонард тодорхой бус шалтгааны улмаас талбайд гарсангүй. Улмаар Кавайгүй Лос Анжелес Клипперс 129:124-өөр ялагдав. Харин Милауки баксын лидер Яннис “галзуурч” 38 оноо, 16 самбар авсан байна. Түүнийг зогсоох үүрэгтэй Кавай Леонард хариуцлагаас зугтаасан нь Яннисын ийн дураар аашлахад хүргэлээ гэж үзэх мэргэжилтнүүд олон байна. Ямар ч бэртэл, гэмтэлгүй атлаа тоглолт өнжсөн нь Кавай Леонардыг сагс сонирхогчдыг үл хүндэтгэж байна, цаашлаад аварга домгийн хэмжээнд яригдах сэтгэл зүйгүй тамирчин гэж түүнийг гоочилж байна.
Энэ үйлдлийн талаар “Хьюстен Рокетс” багт тоглож явсан шилдэг тамирчин Трейси Макрейди “Кавайгийн үйлдэл байж боломгүй хэрэг. 20 мянган иргэн түүний тоглолтыг үзэхээр одонд цугласан шүү дээ. Цаашлаад дэлхий даяар Яннис Леонард нарын тулааныг хүлээж байсан. Би лав миний өрсөлдөгч талбай дээр 38 оноо авч галзуурахыг зүгээр хараад сууж тэвчихгүй. Лидер хүн хэзээ ч ийм хариуцлагаас бултах эрх байхгүй” гэж мэдэгджээ.
Лос Анжелес Клипперс болон Милиуки бакс багууд Дорнод болон Өрнөд бүсийн аваргаар шалгарч цомын төлөө өрсөлдөх хамгийн өндөр магадлалтайд тооцогдож байгаа юм. Сагсанбөмбөг сонирхогчид урьдчилсан шигшээ тоглолтыг үзэхийг хүлээж байсан нь ийнхүү талаар болж байна. Лос Анжелес Клипперс улирлын 5 хожил гурван хожигдолтойгоор үргэлжлүүлж байгаа бол Милауки бакс зургаан хожилтойгоор тэмцээнийг үргэлжлүүлж байна.