Ардчилсан намын ерөнхий нарийн бичгийн даргаар ажиллаж байсан Ц.Тувааныг дэд дарга болгосноор Нийслэлийн Иргэдийн Төлөөлөгчдийн Хурал дахь Ардчилсан намын бүлгийн дарга Ц.Баатархүүг түүний оронд томилжээ. Ардчилсан намын Үндэсний бодлогын хороо өнөөдөр цахимаар хуралдаж энэ шийдвэрийг гаргасан байна. АН-ын дэд даргаар өмнө нь УИХ-ын агсан Г.Батхүү ажиллаж байсан юм. Тэрбээр өнгөрсөн онд Төрийн ордонд өндрөөс унаж амиа алдсан.
Ц.Баатархүүгийн хувьд залуу улстөрч. Тэрбээр Монгол Улсын Их сургуулийн Нийгмийн Шинжлэх Ухааны сургуулийг улс төр судлаач мэргэжлээр төгссөн, 2005-2006 онд Монгол Улсын Засгийн газрын Хэвлэл мэдээллийн албаны дарга, 2012 онд Нийслэлийн Засаг даргын Тамгын газрын Нийслэлийн нийгмийн хөгжлийн асуудал хариуцсан орлогч дарга зэрэг албыг хашиж байсан юм.