-Энэ цаг үедээ Хүрэлсүх гэдэг лидертэй гэдгийг одоо хүлээн зөвшөөрчих!

Жилийн өмнө яг ингэж бичиж байсан. УИХ-ын сонгуулийн дүн тоологдож эхлэхэд бичээд шөнө дунд “Засгийн газрын мэдээ” сонинд илгээж, сонин үүрээр хэвлэлд шилжиж, ажил цуглахад сонин уншигчдын гарт очно гэж тооцсон. 2020 оны сонгуулийн дүнд дүн шинжилгээ хийсэн анхны улс төрийн нийтлэлийг би шигтгэж тэрхүү сонин ба baabar.mn дэх нийтлэлчийн сайтдаа гаргаж тэр нь цаашаа дамжиж хоёр ч чухал сайтад тавигдсан шигээ энэ удаа зориглоод үзье.

Миний нийтлэл монголын хамгийн их уншигчтай baabar.mn; gogo.mn; sonin.mn гурван сайтад тавигдах тул монголын ихэнхи уншигчдад хүрэх болтугай!

Монголын ард түмэн сонголтоо хийчихлээ. Зургаа дахь Төрийн тэргүүнээ санаснаас харин ч зөв шударга, хурдан, зардал чирэгдэл багатай, гомдол хохиролгүй сонгочихлоо. Ёстой ард түмэндээ баярлалаа гэе. Цагаан сонголт нь даваад дахиулна, хэн нь ч “50+1” авч чадахгүй тул дахина, намар хүртэл хойшлоно гэж цуурч, таамаглаж, хүсч байснуудыг бодохул энэ удаа ингэж огцом хурдан, зардал чирэгдэлгүй, тэр дундаа ковидын хүнд нөхцөлд ухаалгаар шийдсэнд нь талархахаас аргагүй.

Гомдоорой гэсэн нь ёж үг шүү дээ. Ялагдагсдад зориулсан ёж үг. Ноднин бол ухаантнууд дүүрчихсэн, “Бид л байхгүй бол эх орон сөнөлөө!” гэсэн малгай уриатай улс төрийн бүх намд (ялсан МАН-аас бусдад нь) хандаж хэлсэн ухаантай юм. Ялагдсаныг нь тавласан ухаантай юм.

Энэ удаа ялагдал хүлээсэн Ардчилсан Нам ба түүний гишүүд дэмжигсэд, нэр дэвшигч, түүний багт хандан харамсалтайгаар хэлж байна. Ард түмэн АН-д ёстой хатуу дүн тавилаа даа гэж.

Ноднингийн УИХ-ын ялагдлаас хойш намрын адаг сараас эхлэн өнөөг хүртэл нам дотроо шившиг шидээ тарин бужигнасан АН-д ард түмэн бараг эцсийн дүн тавьчихсан биш байгаасай!

УИХ-д ганц суудалтай ХҮН-ын ганц гишүүн (Т.Доржханд) одоо Та нарыг захирах, адаглаад үг хэлүүлэхгүй байх бүрэн эрхээ олоод авчихлаа. Та нараас зарим нь тийшээ гүйж очих ч байх. Хагарсан чигээрээ “хоёр АН” УИХ-ын 2024 оны сонгууль хүргэлтэй биш.

Хэрэв “босоо” хэмээх С.Ганбаатар МАХН-аас хөөгдөөд АН руу гүйж очихыг нь амдаад ХҮН-ынхан тосч аваад өөрийн нэрээр (цаана нь “Зөв хүн-Электорат эвсэл”) түүнийг дэвшүүлчихсэн бол харин энэ удаагийн Ерөнхийлөгчийн сонгуулийн дүнд эсрэгээр, эгзэгтэй нөлөөлөх байсан байж болно. 2017 оны Ерөнхийлөгчийн сонгуульд үзүүлсэн амжилтаар нь би тэгж ургуулж тааж байна.

Гэхдээ тэгээгүй юм чинь одоогийн үр дүнг дүгнэе. МАН-ын засгийн эрх барьж буй ерөнхий дүр зураг, ерөнхий сэтгэгдэл муугүй яваа нь харагдлаа. Хамгийн том дэвшил нь хоорондоо таарч тохирохгүй хагарчихаад хоёр салчихсан байсан МАН, МАХН хоёр 100 жилийнхээ ойгоор нэгдэн нийлж, нэг нам болж, тэр их хүчийг нэг дор зангидсаны гавьяа, үр дүн энэ сонгуулиар гарлаа. Монголын ард түмэн эв нэгдлийг хүсдэг юм байна. Хоёр намын эв нэгдлийн энэ үйлсийг зориглон хийсэн (харилцан буулт хийсэн) улс төрчид түүхэнд мөнхрөх болтугай.

Харин энэ сонгуулийн үр дүнгээс хүртэж чадаагүй хуучин МАХН-ын зарим хэсэг нь дахин сэргээх гэж хуйвалдаад явж байхыг үгүйсгэхгүй. Ерөнхийлөгчийн Тамгын газрын багтаамж хэр билээ. Ерөнхийлөгч хэдэн хүнийг хоолонд хүргэх билээ, тооны хязгаартай тул МАН ба тийшээ нэгдэж орсон МАХН-ын гишүүд тооцоолсон л байдаг байгаа?

АН-ын хувьд эцсийн цэг тавилт л биш байгаасай. Дотоод зодоонд нь гишүүд нь бүү хэл эрүүл саруул ухаантай монгол хүн бүр залхлаа. Залхсандаа дүнгээ тавьчихлаа гээд ойлгочих! Гучин жилийн өмнө моод байсан, 30 жил ярьсан ардчиллын тухай тэр ухуулгад монголчууд үндсэндээ цадсан байна. Дарангуйлал тогтоно гэсэн айдсаар айлгаад нэмэр алга. Төрийн гурван өндөрлөг МАН-ын гарттөвлөрнө гэдгээс ч монголчууд огт айсангүй. Ганц л зүйлийг хүслээ. Тэр нь эв нэгдэл ба тайван амгалан амьдрал нь.

Монголд гуравдагч хүчний орон зай байгаа юм байна гэдгийг “Зөв хүн-Электорат эвсэл”, түүний нэр дэвшигч Д.Энхбат нотлож чадсанд ёстой баяр хүргүүштэй. Дотроо хагарсан, хэмлэлцсэн, Дээд Шүүх дээр шившгээ дэлгэсэн, тэгээд дэвшүүлсэн нь авсан саналынхаа тоогоор цоо шинэ нэр дэвшигч Д.Энхбатаас 2-3 дахин доогуур орчихоод явж байгаа, энэ бүхэн юу хэлнэв?

АН-д маш том сургамж, дахин сургамж, шинээр төлөвшиж ариусах, өвөр хоорондын тэмцлээ эгнэгт гээх ухаан хайрлах сонгууль болж өнгөрлөө л гэдгийг харуулж байна. АН энэ ёозоороо үзэлцээд дуусвал юун 2024 оны УИХ-ын сонгууль, түүхнээс арчигдахын даваан дээр ирлээ гэдэгтээ дүгнэлтээ хийгээд парламентын дорвитой, тулхтай, сөрөг хүчин болохыг чин сэтгэлээсээ уриалан дуудъя.

Гарчигт өгүүллээ. “Энэ цаг үедээ Хүрэлсүх гэдэг лидертэй гэдгийг одоо хүлээн зөвшөөрчих” гэж. 2020 оны УИХ-ын сонгуульд МАН ялж 62 суудал авахад ард түмний таньж мэдэхгүй олон шинэ улс төрч тодорсны цаад фон нь ганц энэ нөхөр байсан юм шүү дээ. Тэр нүүрээрээ энэ удаа яалт ч үгүй гараад ирлээ!

Нийтлэлч Б.Баярхүү

Монголчууд найм дахь удаагаа тТөрийн тэргүүнээ сонголоо.  Зургаан жилээр төр барих зургаа дахь Ерөнхийлөгчөөр У.Хүрэлсүх үнэмлэхүй ялалт байгуулав.

Санал өгөх насны бүлгийн хувьд 65-69 насныхан хамгийн идэвхтэй байж нийт санал өгөх хүмүүсийн 75.83 хувь нь саналаа өгчээ. Харин 60-64 насныханы 72.8 хувь, 70-аас дээш насныханы 72.4 хувь нь санал өгч идэвхтэй оролцсон байна. Энэ удаад анх удаагаа санал өгч байгаа 18-19 насны сонгогчид идэвхтэй оролцсоныг дурдах нь зүй. Тэдний 58.3 хувь нь төрийн  тэргүүнээ сонгох ээлжит сонгуульд саналаа өгчээ. Түүхэндээ хамгийн муу ирцтэй сонгуульд У.Хүрэлсүх хамгийн өндөр санал авлаа.

Тэрбээр ялалтын мөчтэй зэрэгцээл Монголынхоо ард түмэнд хандаж үг хэлсэн юм.

У.Хүрэлсүх “Монгол Улсын Ерөнхийлөгчийн найм дахь удаагийн сонгууль хуулийн хүрээнд явагдаж өндөрлөж байна. Манай ард иргэд телевизээр мэдээллийг бидэнтэй хамт авч байгаа гэж бодож байна. Монгол Улсын Ерөнхийлөгчийн сонгуульд манай улсын сонгуульд оролцох насны иргэдийн 60 орчим хувь нь оролцжээ. Энэ иргэдээс МАН-аас нэр дэвшсэн миний бие 65 орчим хувийн санал авсан. Үүнийг би асар том хариуцлага гэж хүлээж авч байгаа. Эхлүүлсэн ажлуудаа дуусгах, хэлснээ хийж хэрэгжүүлэх үүрэг хүлээлээ. Монголын ард түмэн, Монгол Улсын төр засгийг тогтвортой ажиллаасай, улс орондоо олон зүйл хийж бүтээгээсэй, эхлүүлсэн ажлуудаа дуусгаасай гэсэн том итгэл найдварыг үзүүлж энэ удаагийн сонгуульд ард түмэн маань саналаа өглөө гэж үзэж байгаа. Ард түмнийхээ итгэл найдварыг би хичээл зүтгэлээр хариулах болно. Улс орныхоо сайн сайхан амьдралын төлөө чөмгөө дундартал хүчин зүтгэх болно. Үр хүүхэд залуу хойч үеэ сайн сайхан нийгэмд амьдруулахын төлөө зүтгэнэ. Дээр нь Ерөнхийлөгчийн сонгуульд АН-аас нэр дэвшсэн С.Эрдэнэ, ХҮН-аас өрсөлдсөн Д.Энхбатдаа чин сэтгэлээсээ талархаж байгаагаа илэрхийлье. Би энэ сонгуулийг зардал багатай болсон гэж үзэж байгаа. Монголынхоо ард түмэнд чин сэтгэлээсээ баярлалаа. Монгол Улсын төлөө зүтгэе” гэлээ.

 Энэ удаад ХҮН танигдах сонгууль хийсэн бол АН ардчилалаа авч үлдэх эсэхээ үзсэн. Санасныг бодоход ХҮН-ын нэр дэвшигч өндөр санал авч, Монголын Ардчилсан нам гэж байхгүй болсныг харуулав. Н.Алтанхуягийн засгийг огцруулсан хорсол яван явсаар ийнхүү АН-ын аминд хүрлээ гэж дүгнэгдэж байна.

Юутай ч У.Хүрэлсүхийн энэхүү үнэмлэхүй ялалт эргээд Монголын ард түмний зовлон битгий болчихоосой гэж залбирах л үлдэж байх шив.

 Б.Нирун

Монгол Улсын Ерөнхийлөгчийн сонгуулийн ирц 20.43 хувьтай байна. Саналын эрхтэй 2 сая 40 мянга 784 иргэн байгаа юм. Санал хураалт эхэлснээс хойш Монгол Улсын Ерөнхийлөгчийн сонгуулийн тухай хууль болон Зөрчлийн тухай хуулийг зөрчсөн хэд хэдэн тохиолдол бүртгэгдсэн.

Сонгогч нь санал авах байрнаас саналын хуудас авч гарах, саналын хуудсанд тэмдэглэсэн саналаа болон бусад сонгогчийн тэмдэглэсэн саналыг баримтжуулан зураг авах, дүрс бичлэг хийх, шууд дамжуулах, бусдад харуулах нь хуулиар хориотой. Хэрэв дээрх үйлдлийг гаргасан тохиолдолд Зөрчлийн тухай хуульд заасны дагуу тухайн хүнийг арван мянган нэгжтэй тэнцэх хэмжээний төгрөг буюу 10 сая төгрөгөөр торгоно гэж заасан байдаг.

Мөн дараах үйлдлүүдийг Монгол Улсын Ерөнхийлөгчийн сонгуулийн тухай хуулиар хориглосон байна. Үүнд:

• 62.13.Сонгогчид дараах зүйлийг хориглоно:
• 62.13.1.тухайн санал авах байранд саналаа өгөх эрхгүй гэдгээ мэдсээр байж санал өгөх, эсхүл өөр хүний бичиг баримт, хуурамч бичиг баримт ашиглах зэргээр санал өгөх, санал өгөхийг оролдох;
• 62.13.2.тухайн хэсгийн хорооноос олгосноос өөр саналын хуудсыг санал өгөхөд ашиглах, эсхүл санал авах байранд гаднаас саналын хуудас авч орох, санал авах байрнаас саналын хуудас авч гарах;
• 62.13.3.саналын хуудсанд тэмдэглэсэн саналаа болон бусад сонгогчийн саналыг баримтжуулан зураг авах, дүрс бичлэг хийх, шууд дамжуулах зэрэг үйлдэл гаргах;
• 62.13.4.саналын хуудсанд хийсэн тэмдэглэгээг бусдад харуулах, зориулалтын бус үзгээр санал тэмдэглэх;
• 62.13.5.аль нэг нэр дэвшигчийн төлөө санал өгөх, эсхүл өгөхгүй байхаар амлалт авах, мөнгө, эд зүйл шаардах, авах.

Өнөөдөр 2021 оны зургадугаар сарын 9. Түүхэн өдөр.

Монгол Улсын Ерөнхийлөгчийн найм дахь удаагийн сонгуулийн санал хураалт 07.00 цагт орон даяар эхлэв. 2019 онд УИХ-аар баталсан Үндсэн хуулийн нэмэлт өөрчлөлтийн дагуу зургаан жилээр нэг удаа Төрийн тэргүүнээ сонгох энэхүү сонгуульд МАН-аас намын дарга У.Хүрэлсүх, Ардчилсан намаас УИХ-ын гишүүн асан С.Эрдэнэ, Зөв хүн электорат эвслээс “Датаком” ХХК-ийг үүсгэн байгуулагч Д.Энхбат нар нэр дэвшсэн билээ. Нэр дэвшигчид саналаа өгөхдөө Монголын нийт сонгогчдодоо хандаж хэлсэн үгийг нь тоймлон хүргэе.

МОНГОЛ АРДЫН НАМ

МАН-ын нэр дэвшигч У.Хүрэлсүх хоёр охины хамт саналаа өглөө. Тэрбээр хөх даавуун дээлээрээ гоёжээ.

У.ХҮРЭЛСҮХ: Ард иргэд идэвхтэй саналаа өгч байгаад талархаж байна

-Монгол Улсын Ерөнхийлөгчийн найм дахь удаагийн сонгуулийн санал хураалт албан ёсоор явагдаж байна. Энэ жил улс тунхагласны 100 жилийн түүхт ой, Монгол Улсад төрт ёс байгуулагдсаны 2230 жил, Нэгдсэн үндэсний байгууллагад гишүүнээр элссэний 60 жилийн ой гээд түүхэн жил болж байна. Олон тэгш ой давхацсан онцлогтой жил Ерөнхийлөгчийн сонгууль болж байгаа нь сайхан үйл явдал болж байна гэж бодож байна. Ард иргэд маань идэвхтэй санал өгч байгаад талархаж байна. Монголд их олон баялаг бий. Уул уурхай, хүмүүс гээд хамгийн гол баялаг бол Монголын оюун санааны баялаг бөгөөд түүх, соёлынхоо эзэн болсон ард түмэн билээ. Мөн хамтдаа нэр дэвшиж буй Ардчилсан намаас нэр дэвшигч С.Эрдэнэ, “Зөв хүн электорат” эвслээс нэр дэвшигч Д.Энхбат нартаа миний бие сонгуульд нь өндөр амжилт хүсье.

АРДЧИЛСАН НАМ

АН-аас нэр дэвшигч С.Эрдэнэ эхнэрийн хамт ирж саналаа өглөө. Тэрбээр цэнхэр хүрэм, хээтэй цэнхэр зангиагаар гоёжээ.

С.ЭРДЭНЭ: Дарангуйлалгүй ирээдүйг үр хүүхдэдээ үлдээе

-Монгол Улс 8 дахь удаагийн сонгуулиар зургаа дахь Ерөнхийлөгчөө сонгож байна. Иргэдээ Монгол Улсад шударга ёс тогтоох, ёс зүйт төрийн бий болгох, төрд хяналттай байх боломжийг хангасан сонголт хийгээсэй гэж хүсч байна. Өрсөлдөгч нартаа амжилт хүсье. Би Дарангуйлалгүй Монгол, Ардчилсан Монгол гэсэн уриатай сонгуульд орж байгаа. Би ямар нэгэн гоё сайхан амлалт өгөөгүй, мөнгө төгрөг, амлаагүй.  Монгол оронд дарангуйлал бодитоор бий болсон. Цаашдаа дарангуйлалгүй ирээдүйг үр хүүхдэдээ үлдээе гэж бодож байгаа бол сонголтондоо хариуцлагатай хандаарай гэж хэлмээр байна. Энэ гажуудлууд дээр хууль хяналтын байгууллага нь ажиллахгүй, СЕХ нь асуудлыг шийдэхгүй байна.

Залуучууд төрийн үйл ажиллагаанд хариуцлагатай оролцмоор байна. Өөрсдийнхөө ирээдүйг шийдэж байна гэдгээ ухамсарлах хэрэгтэй.

ЗӨВ ХҮН ЭЛЕКТОРАТ ЭВСЭЛ

Зөв хүн электорат эвслээс нэр дэвшигч Д.Энхбат өчигдөр /2021.06.08/ зөөврийн хайрцгаар саналаа өглөө. Тэрбээр ковид-19-ийн халдвар авсны тул ийн зөөврийн хайрцаар саналаа өгч байгаа юм.

Д.ЭНХБАТ: Би Ерөнхийлөгч болбол гадаадад суугаа иргэдийн саналыг цахимаар авдаг болгоно