Монгол Улсын Ерөнхий сайд С.Баярыг Оюутолгой төслийн хүрээнд Монгол Улсын Засгийн газар, “Айвенхоу Майнз Монголия Инк” ХХК, “Айвенхоу Майнз Лимитед”, “Рио Тинто Интернэшнл Холдингс Лимитед” компанийн хооронд 2009 оны 10-р сарын 6-ны өдөр байгуулсан Хөрөнгө оруулалтын гэрээтэй холбоотой асуудлаар АТГ-аас шалгаж эхэлсэн. Уг асуудлаар баривчлан саатуулж байв
Түүнийг мөн 2007-2009 онд Монгол Улсын Ерөнхий сайдаар ажиллаж байх хугацаандаа хууль зөрчин, албан тушаалаа урвуулан ашиглаж, хувьдаа их хэмжээний хөрөнгөтэй болж, түүнийгээ оффшор бүсээр дамжуулан, гадаад улсад үл хөдлөх хөрөнгө худалдан авсан байж болзошгүй гэсэн үндэслэлээр шалгаж эхэлсэн талаар мэдээлж байв.
Өнгөрсөн оны 11-р сард Авлигатай тэмцэх газрын Олон нийттэй харилцах ахлах ажилтан, ахлах комиссар Т.Баярхүү “Оюутолгойн гэрээтэй холбоотой асуудлаар С.Баяр, С.Баярцогт, Ч.Сайханбилэг нарт холбогдох хэргийн мөрдөн шалгах ажиллагаа дууссан. Шүүхэд шилжүүлэх саналтай прокурорын байгууллагад шилжүүлсэн” хэмээн мэдээлсэн билээ.
С.Баярт холбогдох хэрэгт прокурор яллах дүгнэлт үйлджээ. Улмаар өөрт нь гардуулж өгөх гэхэд татгалзсан байна. Энэ талаар тэрбээр твиттер хуудастаа “Өчигдөр /2020.03.11/ надад прокурорын яллах дүгнэлт гардуулах гэв. Авахгүй гэдгээ мэдэгдэв. Учир нь би байтугай, тэд ичмээр дэндүү зохиомол, хөгийн үндэслэл бүхий яллах дүгнэлт аж. Урьд өдөр нь ачина гэж айлгав. Ачигдахыг хэн хүсэх билээ. Гэхдээ мань мэт арай өөр. Жарнаа үзсэн хүн айх юм бага” хэмээн жиргэсэн юм.