Хуульч Ч.Өнөрбаяр Ерөнхий сайд У.Хүрэлсүхийн мэдэгдэлтэй холбоотой хэвлэлийн бага хурлыг өнөөдөр “Өдрийн сонин”-ы Асуух эрхийн танхимд хийлээ.
Ч.Өнөрбаяр “Монгол улсын Засгийн газрын дөрвөөс доошгүй гишүүн давхар дээлтэй байх, Ерөнхий сайд Засгийн газрын гишүүдээ өөрөө бүрдүүлэхтэй холбоотой заалтууд ирэх тавдугаар сарын 25-наас мөрдөгдөнө гэж Үндсэн хууль дээр буй. Ерөнхий сайдад ямар хүн хуулийн зөвлөгөө өгдгийг мэдэхгүй ч Үндсэн хуулийн нэмэлт өөрчлөлт хүчин төгөлдөр болох хугацааг зөв хэлээд өгөөч. Тавдугаар сарын 24-өөс мөрдөгдөнө гээд буруу яриад байна. Тэгэхээр Ерөнхий сайд та Үндсэн хуулиа уншаагүй байна” гэв.
Тэрээр засгийн газар огцрох эрх зүйн үндэслэл нэгэнт бий болсон гэж үзэж буй. Ерөнхий сайд У.Хүрэлсүх гуравдугаар сарын 27-нд мэдэгдэл хийхдээ “Монгол улсын Засгийн газар огцрохгүй. Батлагдсан шинэ Үндсэн хууль тавдугаар сарын 24-нөөс эхлээд үйлчилнэ. Гэхдээ Үндсэн хуулийг дагуулаад бусад хуулиуд гарах ёстой. Энэ хуулийн хүрээнд Засгийн газар огцрох шинээр бүрдүүлэх эсэх тухай асуудлыг тэр дагавар хуулиудаар шийдвэрлэнэ. Харин энэ хуулийг УИХ яаралтай баталж шийдвэрлэх ёстой” хэмээсэн.
Харин Ч.Өнөрбаяр “УИХ-аас Ерөнхий сайд танд гэрийн даалгавар өгсөн. Үндсэн хуульд оруулсан нэмэлт өөрчлөлтийг дагаж мөрдөх журмын тухай хуулийг хэрэгжүүлэхтэй холбоотой тогтоолын төслийг энэ оны нэгдүгээр сарын 9-ны өдөр УИХ-д батлан гаргасан. Энэ тогтоолоор Ерөнхий сайдад Монгол улсын Үндсэн хуульд оруулсан нэмэлт өөрчлөлтөд нийцүүлэн холбогдох хууль тогтоомжийн төслийг боловсруулж УИХ-д өргөн мэдүүлэх ажлыг хариуц гэж үүрэг даалгавар өгсөн. Тэгэхээр хуулийн төслийг УИХ биш Ерөнхий сайд та өөрөө боловсруулах ёстой” гэсэн юм.