УЛС ОРНЫ минь тусгаар тогтнол, оршин тогтнохын үндэс нь эх орон, газар шороо, хэл соёл, ард түмэн нь билээ. Энэхүү үнэт зүйлсийн амин холбоо, алтан гагнаас нь Монголын ард түмний эв нэгдэл юм. Эвт шаазгай буга барина гэж ардын сайхан үг байдаг. Монголчууд бид эвтэй байхдаа хүчирхэгжин мандаж, эвдэрч талцсан үедээ уруудан доройтож байсныг буурал түүх бидэнд үргэлж сануулсаар ирсэн. Миний бие Монгол Улсын Ерөнхийлөгчийн хувьд ард түмнийхээ эв нэгдлийг нүдний цөцгий мэт хайрлан хамгаалж, зөвийг сахиж, эвийг эрхэмлэсэн, эвлэрлийг дэмжсэн төрийн тэргүүн байх болно.
Энэ бол У.Хүрэлсүхийн тангараг өргөхдөө хэлсэн үг. Тэрбээр өнгөрсөн хоёр жил дотоодын эв нэгдэлд ихээхэн анхаарч ирсэн. Хуваагдал, талцалд идэгдсэн олон салбарт эв нэгдэл авчирсан билээ.
-ДЭЛХИЙ нийтээрээ энх тайван, аюулгүй байдал, тогтвортой хөгжлийн төлөө хүсэл тэмүүлэлтэй байж, эл байдлыг тэтгэгч улс төр, эдийн засаг, байгаль орчин, нийгэм соёлын хөрс суурийг бататган бэхжүүлж, хүч, хөрөнгө зарцуулснаар бид амар амгалан аж төрөх төдийгүй ирээдүй хойч үедээ энх тайван, хөгжил цэцэглэлтийг цогцлоосон дэлхий ертөнцийг үлдээж чадна.
Энэ бол өнгөрсөн намар НҮБ-ын чуулгад оролцохдоо хэлсэн үг. Монгол өнөөдөр төвийг сахисан, олон тулгуурт нээлттэй гадаад бодлого хэрэгжүүлэхэд Ерөнхийлөгч У.Хүрэлсүхийн үүрэг, оролцоо чамгүй их байгаа билээ.