Монгол Улс энэ жил айлчин гийчид ихтэй байна. Хамгийн сүүлд гэхэд БНСУ-ын Гадаад хэргийн сайд Пак Жин Монголд айлчиллаа. Үүний өмнө Японы, Оросын, Хятадын Гадаад хэргийн сайд нар болон НҮБ-ын Ерөнхий нарийн бичгийн дарга ноён Гутерреш Монголд айлчилсан билээ. Эдгээр айлчлал болгон өөр, өөрийн онцлогтой, Монголд тодорхой үр дүн авчирсан агаад манай улсын хувьд том сурталчилгаа, үндэсний аюулгүй байдлын маань нэгээхэн хамгаалалт болж байна.
Мөн энэ бүхэн У.Хүрэлсүхийн улс төртэй холбогдох нь гарцаагүй.
Учир нь, Монгол Улсын Ерөнхийлөгчөөр У.Хүрэлсүх сонгогдсоны дараагаас Монголын олон талт гадаад харилцаа буцаад идэвжсэн, сэргэсэн юм.
Тэр тусмаа дэлхийн улс төрийн нөхцөл байдал өөрчлөгдөж, хөрш орнуудын гадаад, дотоод улс төр тунд хүнд байгаа үед жижиг улсын Төрийн тэргүүн бодлоготой бодолтой байгаагийн нэг нь гадаадын элч төлөөлөгчийг урих, хүлээн авах зэргээр Монголыг олон улсад таниулах, сурталчилах, үндэсний аюулгүй байдлаа хангахад анхаарч буй явдал. Үнэндээ хоёр их гүрний дунд орших жижиг улсын зовлон их. Эдийн засгаа хөгжүүлэх, улс орныхоо аюулгүй байдлаа хангахын тулд хөршүүдийнхээ, гуравдагч орнуудын арга эвийг олохоос эхлээд Төрийн тэргүүний хувьд У.Хүрэлсүхийн төвийг сахисан, олон тулгуурт гадаад бодлогыг хангасан, ардчиллаа хамгаалсан том тоглолт хийж байгаад талархууштай.