Ерөнхийлөгч У.Хүрэлсүх тангараг өргөхдөө эв эеийг нүдний цэцгий мэт хайрлаж явна гэсэн. Эв эе гэдэг нь гадаад, дотоодын амгалан байдлаа хамгаалахаа хэлсэн хэрэг биз ээ.
Ши Жиньпинийн урилгаар “Бүс ба Зам” арга хэмжээнд оролцож буй У.Хүрэлсүх Бээжинд Оросын ерөнхийлөгч В.Путинтай уулзжээ. Путин дэд, бүтэц эрчим хүчний салбарт хамтаръя. Монголоос нийлүүлж байгаа мах, ноос, ноолууран бүтээгдэхүүний татварыг бууруулъя гэж. Мэдээж, Оросоос зугатлаа гээд Монголын Оросын мөнхийн хөрш байх нь ойлгомжтой. Тэгээд ч бид тэднээс бензин, шатахуун, эрчим хүч гуйж авч байгаа болохоор дороо буурьтай, дотроо бодолтой байхаас өөр аргагүй. Мэдээж ингэлээ гээд баавгайн талд байлдана гэсэн үг биш. Монголчууд түүгээр яваа гайг үүгээр дуудах хэрэггүй гэдэг. Монголын асуудал бол Монголын асуудал. Монголчууд амар амгалан, хөгжил дэвшилтэй байлгах нь Төрийн тэргүүний үүрэг.
Тэрбээр саяхан гуравдагч оронд, Францад зочлоод ирсэн. Харин өдгөө хоёр хөрштэйгөө уулзаж байна. Монгол төвийг сахисан, ардчилсан, олон тулгуурт гадаад бодлоготой орон. Үүнийгээ, үүргээ, үндэсний аюулгүй байдлаа У.Хүрэлсүх сайтар ухамсарлаж буй. Тэр лав Монголоо зарахгүй, улсаа худалдахгүй нь үнэн. Тиймээс ШХАБ-д элсэхгүй гэдгээ ил тод хэлсэн. Мэдээж, хөршүүд бие, биеэ урих нь байдаг л хэрэг. Тэглээ гээд энэ нь Орост очоод наалдана гэсэн үг биш билээ.