ЭМЯ-наас ээлжит мэдээллээ өглөө. ХӨСҮТ-ийн захирал Д.Нямхүү “2020 оны дөрөвдүгээр сарын 13-нд үдээс хойш нэг өвчтөн эдгэрээд ХӨСҮТ-өөс гарлаа. Ингээд таван хүн эдгэрч, эмнэлгээс гарч байна. ХӨСҮТ-өөс эдгэрч гарсан хоёр хүн 14 хоног тусгаарлалтад байж байгаад өрхийн эмчийн хяналт буюу өөрийнхөө гэрт тусгаарлагдахаар шилжсэн. Тусгаарлагдсан хугацаанд хэд хэдэн удаа шинжилгээ авахад сөрөг гарсан. Бид цаашид гэртээ байх хугацаанд нь шинжилгээ авч, хянана.

• Сөүл-Улаанбаатар онгоцоор ирсэн 260 хүний шинжилгээнээс коронавирус илрээгүй.
• Тандалтын зорилгоор шинжилгээ хийсэн 19 хүний хариу мөн сөрөг гарсан.

ХӨСҮТ-д тусгаарлагдсан 17 хүн, ОХУ-аас ирж тусгаарлагдсан 149 хүн, Дархан-Уул аймагт тусгаарлагдсан 44 хүн уг шинжилгээнд хамрагдсан. Түүнчлэн дөрөвдүгээр сарын 13-нд хийсэн шинжилгээнээс 13 хүнд коронавирусийн тохиолдол илэрлээ. Дархан-Уул аймагт нэг тохиолдол бүртгэгдлээ. Түүнийг өнөөдөр өглөө тусгай баг явж, Дархан-Уул аймгаас ХӨСҮТ-д авчирч, тусгаарлах, эмчлэх ажилдаа орсон. Бусад нь Улаанбаатарт тусгаарлагдсан байсан. Тэднийг бүгдийг нь тусдаа өрөөнд оруулсан. Давтан шинжилгээг үргэлжлүүлэн хийнэ. Ингэснээр нийт 25 хүн ХӨСҮТ-д эмчлэгдэж байна” гэв.

Даваа гаригийн оройны байдлаар “COVID-19” халдвар дэлхийн хэмжээнд 2019320 хүнд халдварлаж, 119483 хүн нас бараад байна. Шинэ коронавируст халдвар БНХАУ-ын Ухань хотод өнгөрсөн 12 дугаар сард анх дэгдсэнээс хойш дэлхийн бараг бүх улс оронд тархаж, халдварыг хязгаарлахын тулд тогтоосон хөл хорионы арга хэмжээнүүд олон сая хүний өдөр тутмын амьдралд нөлөөлөөд байна. АНУ-д халдварын хамгийн олон буюу 577 мянга гаруй тохиолдол бүртгэгдэж, 23219 хүн нас баржээ.

ХЭҮК-ын дарга Ж.Бямбадоржийн нэгэн бичлэгийг “Зөв амьдрах ухаан” ТББ-ын дарга Г.Загдаа олон нийтэд ил болгосон. Тиймээс Ж.Бямбадорж өнөөдөр сэтгүүлчдэд хандан “Намайг утсаар ярьсан бичлэгээр жил шахам дарамталж байгаа юм.

Би “Чи хүнтэй арслан, бар шиг харьцах юм. Чи хүмүүстэйгээ зөв харьцаач ээ” гэдэг хэсгийг хассан. Хүн гөлөгтэй хамгийн энхрий харьцдаг шүү. Чи хүнтэй хүнлэг харьц гээд бүр болохгүй болохоор нь тэгж хэлсэн. Тэнд янз бүрийн хүн очиж байгаа учраас Г.Загдаагийн уурыг хүргэдэг байх. Тэр бол миний хоолой мөн. Тэр ярианы өмнө 40 орчим минутын яриа байсан. Хууль бус үйл ажиллагаагаа зогсоо гэж аргаа ядахдаа “Чи нэг иймэрхүү байгаач” гэж хэлснийг минь олзолж байна. Би ямар хараал хэлсэн гэж. Би тэр хүмүүсийг битгий зодож, хараагаасай гэсэндээ аргаа барсандаа тэр үгийг яриан дундаа хэлсэн” гээд Г.Загдаагийн муу муухайг гайхжээ. Үнэндээ хүний эрхийг хүчирхийлэгч Г.Загдаагаасаа ХЭҮК-ийн дарга Ж.Бямбадорж дээрдээд байх зүйл алга.

ХЭҮК хамгийн их улстөрждөг, хүний эрхийг хамгийн их зөрчдөг газар болсныг түүний үг, үйлдлээс харагдаж байгаа юм. Тэр хэлсэн үгэндээ хариуцлага хүлээгээд зогсохгүй ажлаа хийж чадаагүйн төлөө ажлаасаа чөлөөлөгдөх ёстой.

Монгол хүний эрхийг зөрчиж буй аливаа үйлдэлтэй тэмцэж, хүний эрхийг хамгаалах, урьдчилан сэргийлэх нь Ж.Бямбадоржийн хийх ажил. Гэвч, Г.Загдаад цагдаа хүртэл дийлэхгүй “томрох”-од нь Ж.Бямбадоржийн буруу асар их бий. Учир нь тэр бол Монголын хүний эрхийг хамгаалах ёстой, төрийн хараат бус субъектийн дарга.

Харамсалтай нь, хэлсэн үгэндээ “барьцаалагдаж, Д.Халиун гэгч бүсгүй бие, сэтгэлийн шархтай үлдэж, Г.Загдаа гэгчид хүчирхийлүүлж байхад чив чимээгүй явсан нь тэр ажилдаа тэнцэхгүй, тэтгэвэртээ гарах цаг нь болсны илрэл юм. Тиймээ, Ж.Бямбадоржийг тэтгэвэрт нь гаргах цаг болж. Хүний эрхийг хамгаалж чадахгүй ХЭҮК-ийн хөгшин дарга нарыг тэтгэвэрт нь суулгая. Хүний эрх бол хүний заяамал эрх билээ.

ЭМЯ-наас ээлжит мэдээллээ өглөө. ХӨСҮТ-ийн дарга Д.Нямхүү “2020 оны дөрөвдүгээр сарын 12-нд ХӨСҮТ-д 20 хүнийг нэмж тусгаарласан. Тэдгээр иргэдийн нэгэнд нь коронавирус илэрлээ. Монгол Улсад нийт батлагдсан халдварын тоо 17 боллоо. Үүнээс дөрвөн хүн эмчлэгдэж гарсан. ХӨСҮТ-д 13 иргэн эмчлүүлж байна” гэлээ. Шинэ коронавирусээс өвчилсөн иргэн нь Бямба гаригт ОХУ-аас ирсэн хүн аж.

Мөн өнгөрсөн амралтын өдрүүдэд 231 хүнээс шинжилгээ хийсэн  бөгөөд шинжилгээгээр хариу нь сөрөг гарсан байна.

ОХУ-аас ирж, Дархан-Уул аймагт ажиглалтад орсон 74 хүнээс коронавирус илрээгүй. Ажиглах байранд байгаа БНСУ-аас ирсэн 110 хүн, Цэргийн төв эмнэлэгт байгаа 11, Сэлэнгэ аймагт тусгаарласан дөрвөн хүний шинжилгээнээс халдвар илрээгүй. Тандалтын шугамаар 13 хүнээс шинжилгээ авахад халдвар илрээгүй. Өнөөдрийн байдлаар 225 хүн ХӨСҮТ-д эмчлүүлж байна.

Эмчлэгдэж эдгэрээд, тусгаарлалтад гарсан эхний хоёр хүнээс хоёр удаа шинжилгээ авсан. Коронавирус илрээгүй. Тэд ажиглах байрнаас шилжиж, гэртээ гарсан. Гэхдээ гэртээ 14 хоног тусгаарлалтад байна. Бид энэ хүмүүстэй харилцаатай байж, давтан шинжилгээг шат дараатай хийнэ” гэлээ.

УОК-ын Шуурхай штабаас мэдээлэл хийлээ. Гадаад харилцааны сайд Д.Цогтбаатар “Тусгай үүргийн нислэгээр дарга цэрэг нарын хүүхдийг авч ирлээ гэсэн шүүмжлэл тасрахгүй байна. Тиймээс энэ асуудалд тайлбар өгч байна. Тусгай үүргийн онгоцоор ирэх иргэдэд таван шалгуур тавьсан. Жишээ нь, эмчилгээ хийлгэж байсан жирэмсэн, ахмад настай, хөгжлийн бэрхшээлтэй, бага насны хүүхдийг авчрах шалгуур тавьж байна. Энэ шалгуураар хүмүүсээ авчирсан. Өнгөрсөн хугацаанд Монгол Улс нийт 6000 гаруй иргэнээ авч ирсэн байна. Визний зөрчилтэй иргэд ч маш их байсан. Хорих, торгуулах зөрчилтэй иргэд байсан. Бид нэг ч иргэнд хариуцлага тооцуулаагүй асуудлыг шийдсэн.  Ирж байгаа иргэдийг 1,1 өрөөнд 21 хоног тусгаарлаж байгаа. Тэгэхээр тусгаарлах байр эмч нарын ачааллыг харж байж дараагийн нислэгээ тооцоолох ёстой. Бид хоёрхон онгоц, цөөхөн экпажтай. Гэтэл нөгөө хэд маань нэг нислэгээс ирээд л тусгаарлагдаж байгаа. Тэгэхээр иргэд нөхцөл байдлыг ойлгох хэрэгтэй. Одоо нислэг үйлдэхэд төвөгтэй байдал үүсч байна. Улс орнууд хилээ хаагаад эхэлж байна. Гадаадад байгаа иргэдийнхээ мэдээллийг Элчин сайдын яамдуудаас мэдээллийг байнга авч ажиллаж байгаа. Токио руу нислэг үйлдэх боломжгүй болсон. Япон Улс хилээ хаасан” гэв.

 УОК-ын орлогч, ОБЕГ-ын дарга Т.Бадрал “Өнөөдрийн байдлаар 43 улсаас 7626 иргэн эх орондоо ирэх хүсэлтээ тавиад байна. Дараагийн нислэгийг дөрөвдүгээр сарын 17-нд хийхээр төлөвлөж байна. Ингэхдээ зөвхөн БНСУ-аас иргэдийг авч ирэхгүй. Европоос бас иргэдээ татаж авна. Энэтхэгт байгаа иргэдийнхээ асуудлыг ч ярьж байна. Австралид байгаа иргэд санхүүгийн асуудалд орж байна. Тиймээс тэдгээр иргэнээ яах вэ гэх асуудлыг Засгийн газартай нь ярьж байна” гэв.

ОХУ-д хөл хорио тогтоосонтой холбогдуулан Москва, Санкт-Петербург хотуудаас Улаан-Үд хотод очсон иргэдийг 14 хоног тусгаарлах арга хэмжээ авч байгаатай холбогдуулан Улаан-Үд хотод суугаа Монгол Улсын ЕКГ-аас ОХУ-ын Бүгд Найрамдах Буриад Улсын холбогдох байгууллагуудтай тохиролцсоны үндсэн дээр Москва хотоос 2020 оны дөрөвдүгээр сарын 11-ний өдөр Улаан-Үд хотод очих иргэдийг уг тусгаарлалтад оруулахгүйгээр нэгдсэн журмаар Хиагт боомт хүргэх болсон тул иргэдийг тухайн өдөр өөр төрлийн тээврийн хэрэгсэл захиалахгүй байхыг анхааруулж байна.

Иргэдийг 2020 оны дөрөвдүгээр сарын 11-ний өдөр Улаан-Үд хотод очиход ЕКГ-аас тусгай автобус бэлтгэсэн байх бөгөөд Хиагт боомт хүртэл үнэгүй тээвэрлэнэ. Түүнчлэн Улсын Онцгой Комиссоос Хиагт-Алтанбулаг боомтоор хил нэвтрэх иргэдийг 21 хоног тусгаарлах шийдвэр гаргасан тул нутаг буцахаар бүртгүүлсэн иргэд тусгаарлах байрны төлбөр болох 1,050,000 төгрөг /хэрэв 700,000 төгрөг төлсөн бол зөрүү болох 350,000/-ийг ОБЕГ-ын Хаан банк дахь 5084538375 тоот дансанд яаралтай тушаана уу.

Улсын Онцгой Комиссоос төлбөр төлөөгүй иргэдийг улсын хилээр нэвтрүүлэхгүй гэсэн байр суурьтай байгааг анхааруулахын зэрэгцээ Та бүхнийг хувийн аюулгүй байдлаа сайтар хангахыг зөвлөж байна.