Монгол Улсын зургаа дахь Ерөнхийлөгчөөр сонгогдсон У.Хүрэлсүх баярын мэндчилгээнд дарагдсаар байна. Түүнд хоёр хөршөөс эхлээд Хойд Солонгосын удирдагч хүртэл баярын цаххилгаан ирүүлжээ.
ОХУ: У.Хүрэлсүхэд найдаж байна
ОХУ-ын Ерөнхийлөгч Владимир Путин Монгол Улсын ерөнхийлөгчийн сонгуульд ялалт байгуулсанд нь У.Хүрэлсүхэд баяр хүргэжээ. Кремлийн хэвлэлийн албаны мэдээлснээр, У. Хүрэлсүхэд ОХУ-ын төрийн тэргүүн баяр хүргэсэн цахилгаан илгээсэн байна.
“Санал хураалтын дүн таны улс төрийн нэр хүнд өндөр байгааг бүрэн батлан харууллаа. Төрийн тэргүүний хувиар явуулах таны үйл ажиллагаа хоёр улсын стратегийн цогц түншлэлийн харилцааг цаашид бэхжүүлэхэд тус болно гэж найдаж байна” хэмээн В.Путин баяр хүргэсэн цахилгаандаа дурджээ.
ХЯТАД: Хятадын ард түмэнд танил болсон Монголын улстөрч
БНХАУ-ын Гадаад хэргийн яамны хэвлэлийн төлөөлөгч Ван Вэньбинь: Ноён У.Хүрэлсүх нь Хятадын ард түмэнд танил болсон Монголын улстөрч бөгөөд Хятад, Монголын найрсаг хамтын ажиллагааг хөгжүүлэхээр олон жилийн турш хичээн зүтгэж, хоёр улсын харилцааны хөгжилд чухал хувь нэмэр оруулсан. Бид түүнд Монгол Улсын Ерөнхийлөгчийн сонгуульд ялалт байгуулсанд баяр хүргэж байна.
ДАЛАЙ ЛАМ: Буддын сургаалийг У.Хүрэлсүх дэмжинэ гэдэгт итгэж байна
“The Hans India” сайтад Дээрхийн гэгээнтэн XIV Далай лам Монгол Улсын Ерөнхийлөгчийн сонгуульд ялсан У.Хүрэлсүхэд баяр хүргэсэн талаар бичжээ.
Уг захидалд “Буддын сургааль энэрэнгүй сэтгэлийг чухалчилдаг, хувь хүний үзэл бодолтой зөрчилдөггүй, хүн бүрт тусаа өгдөг. Монгол болон Төвөдийн ард түмэн бол эх түүхээрээ холбогдсон, ихэр ахан дүүс шиг улс. Энэ үнэт зүйлсийг У.Хүрэлсүх болон Монголын Засгийн газар цаашид ч хамгаалан дэмжинэ гэдэгт итгэж байна” гэжээ.
БНАСАУ: У.Хүрэлсүхэд баяр хүргэв
БНАСАУ-ын зүгээс Монгол Улстай уламжлалт найрсаг харилцаагаа тууштай хөгжүүлэх байр суурь баримталж байгааг онцолжээ. Мөн тэрбээр БНАСАУ-ын Төрийн Зөвлөлийн дарга Ким Жон Унаас Монгол Улсын Ерөнхийлөгчөөр сонгогдсон У.Хүрэлсүхэд илгээсэн мэндчилгээг гардуулжээ.