ЗГХЭГ-ын дарга Ц.Нямдоржид дургүй улстөрч МАН-д цөөнгүй бий. Тэдний нэг нь УИХ-ын гишүүн Б.Энхбаяр. Тэрбээр аливаа асуудалт намчирхалгүй эрүүл бодитой ханддаг гишүүдийн нэг. Ц.Нямдоржийн хууль бус үйлдлийг нэг бус удаа шүүмжилдэг. Ц.Нямдоржтой ана, мана үзэлцдэг хүн.
УИХ-ын гишүүн Б.Энхбаяр Хууль зүй, дотоод хэргийн сайд асан, ЗГХЭГ-ын дарга Ц.Нямдоржийн тухай өөрийн цахим хуудсаараа дамжуулан шүүмжлэлтэй байр суурийг илэрхийллээ. Тэрбээр “Э.Бат-үүл Ц.Нямдоржийг “хорт могой” гэнэлээ.Би үүнтэй санал нийлэхгүй. Могой ганц толгойтой, ганц биетэй. Тэр олон гартай, олон ч хөлтэй. “Хуулийн хулгайтай тэмцэнэ” гэсэн сонгуулийн уриа дэвшүүлж миний бие зүгээр ч нэг УИХ-д нэр дэвшээгүй. Ямар ч хувь хүн хуулийн хийдэл, системд хулгай хийх боломжгүй, тийм эрүүл бөгөөд ил тод, тийм хяналттай бөгөөд хариуцлагатай ажиллах эрх зүйн орчинг бий болгохыг зорьж хууль тогтоогч больё гэж шийдсэн. Эхлээд Шүүхийн шинэтгэлийг барьж авсан. Энэ бол дөнгөж эхлэл. Цаашаа Прокурор, мөрдөх болон гүйцэтгэх албаны эрх зүйн орчин цогцоороо сайжирч байж урагшилна. Хувьдаа шударга ёсыг өмчилж, хуулийн дээр гарч, хууль бол би гэх хүртлээ даварч хөлжсөн Нямдоржтонгуудыг зайлуулах цаг болсон. Парламентат ёс энэхүү тэмцлийн гол хүч болно гэдэгт итгэлтэй байна. Намын ард нуугдаж мөнгө угаадаг мангасуудтай тэмцэнэ” гэлээ. Өөрөөр хэлбэл, УИХ дахь МАН-ын хамгийн эрүүл, зөв гишүүн гэгддэг Б.Энхбаяр намынхаа мөнгө угаадаг мангасуудтай тэмцэхээ илэрхийлжээ. Харин түүнийг мангасууд нь нам дарах вий дээ гэсэн болгоомжлол иргэдийн дунд байна.
А.АНАР