Монгол Улсын Ерөнхийлөгч Х.Баттулгын ОХУ-д хийх сүүлчийн айлчлалыг нь В.Путин хүлээж авахгүй, биечлэн уулзахаас татгалзсан мэдээлэл хойд хөршийн хэвлэлүүдээр гарч эхэлжээ.
Тус улсад суугаа Монголын Элчин сайд Д.Даваагаар дамжуулан Ерөнхийлөгчийн Тамгын газрын дарга Ө.Шижир Х.Баттулгыг Орост айлчлуулах талаар хөөцөлдөж байгаа ч В.Путины бие төлөөлөгчид түүнийг хүлээж авах боломжгүй болохыг Гадаад харилцааны сайд Б.Батцэцэгтэй утсаар ярихдаа дамжуулсан бололтой.
Энэхүү мэдээлэл Монголын хэвлэлүүдээр цацагдсаны дараа Монгол Улсын Ерөнхийлөгч Х.Баттулга ОХУ-ын Ерөнхийлөгч В.Путинтай утсаар ярьсан гэх мэдээлэл president.mn сайтад тавигдсан юм. Уг сайтад мэдээлснээр “Монгол Улсын Ерөнхийлөгч Халтмаагийн Баттулга өнөөдөр ОХУ-ын Ерөнхийлөгч В.В.Путинтай утсаар ярьж, цаг үеийн болон хоёр орны харилцааны зарим асуудлаар санал солилцлоо.
Төрийн тэргүүн нар 2021 онд тэмдэглэн өнгөрүүлж буй Монгол Улс, ОХУ-ын хооронд дипломат харилцаа тогтоосны 100 жилийн ойн мэндийг харилцан дэвшүүлж, ойн хүрээнд хоёр тал олон арга хэмжээг хамтран хэрэгжүүлж эхлээд байгааг сайшаав.
ОХУ-ын Ерөнхийлөгч В.В.Путин хоёр орны хамтарсан сансрын нислэгийн 40 жилийн ой тохиож байгааг тэмдэглээд, ойн хүрээнд сансрын нисгэгч Ж.Гүррагчааг ОХУ-ын төрийн дээд шагнал “Александр Невскийн одон”-гоор шагнасан гэдгээ хэллээ. Талууд уламжлалт найрсаг харилцаатай хоёр орны хамтын ажиллагааг бүх түвшинд өргөжүүлэн хөгжүүлэхэд санал нэгдэж, дипломат харилцаа тогтоосны 100 жилийн ойн тухай хоёр улсын төрийн тэргүүн нарын хамтарсан тунхаглалыг ойрын үед гаргахаар тохиролцлоо.
Монгол Улсын Ерөнхийлөгч Халтмаагийн Баттулга ОХУ-ын эрдэмтэд коронавируст цар тахлын халдварын эсрэг вакциныг амжилттай хөгжүүлж, хэрэглээнд нэвтрүүлсэнд баяр хүргэв. ОХУ-ын Ерөнхийлөгч В.В.Путин Монгол Улсад вакцин нийлүүлэх асуудлаар Монгол Улсын Ерөнхийлөгчөөс 2021 оны хоёрдугаар сарын 11-ний өдөр илгээсэн захидлыг хүлээн авсан гэдгээ хэлэв.
Мөн Монгол Улсын Ерөнхийлөгч болон Монголын талаас ирүүлсэн бүх хүсэлтийн хүрээнд Монгол Улсын Эрүүл мэндийн яам болон хувийн хэвшлийнхэнтэй вакцин нийлүүлэх гэрээ байгуулж байгаа гэв.
Монгол Улсын Ерөнхийлөгч Халтмаагийн Баттулга вакцинтай холбоотой Монгол Улсын Засгийн газрын хүсэлтэд дэмжлэг үзүүлж буйд талархал илэрхийлж, “Sputnik V” вакцины нийлүүлэлтийг түргэвчлэхэд анхаарал хандуулж ажиллахыг хүслээ. ОХУ-ын Ерөнхийлөгч В.В.Путин хоёр орны түүхэн харилцааны онцгой ач холбогдлыг харгалзан үзэж, Монгол Улсад тэргүүн ээлжинд вакцин нийлүүлэхэд анхаарал хандуулж ажиллана гэлээ.
Түүнчлэн Монгол Улсын Ерөнхийлөгчийн ОХУ-ын талд тавьсан “Sputnik V” вакциныг Монгол Улсад үйлдвэрлэх санал, түүнийг хэрэгжүүлэх боломжуудын талаар талууд санал солилцлоо. ОХУ-ын Ерөнхийлөгч В.В.Путин Монгол Улсын Ерөнхийлөгчийн саналыг дэмжиж, вакцин үйлдвэрлэх боломжийг судлах Ажлын хэсэг гаргахаар болов.
ОХУ-ын Ерөнхийлөгч В.В.Путин Монгол Улсын Ерөнхийлөгчтэй ойрын үед биечлэн уулзах боломж бүрдэнэ гэдэгт итгэлтэй байгаагаа илэрхийллээ” гэжээ.
Гэвч, үнэндээ хоёрхон сарын дараа болох Ерөнхийлөгчийн сонгуулийн өмнө Ерөнхийлөгч Х.Баттулга ОХУ-д айлчлал хийх боломжгүй юм. Түүний айлчлалыг В.Путин хүлээж аваагүй нь Х.Баттулга дахиж нэр дэвших боломжгүй гэж үзэж байгаатай холбоотой болохыг улстөрчид тайлбарлаж байна.
Б.НИРУН