Улсын хэмжээнд ирэх тавдугаар сард цэрэгт татлага явагддаг. Гэвч энэ жил зарим аймгуудад цэрэг татлага явагдахгүйг УОК-ийн хуралдаанаар шийдвэрлэжээ. Энэ тэлээр Засгийн газрын хэвлэл мэдээллийн албаны дарга Ц.Ганзориг “Энэ оны тавдугаар сард цэрэг татлага болно. Хяналтын тоог Засгийн газар тогтоосон. Тусгаарлах үйл ажиллагаа явуулж буй Улаанбаатар, Сэлэнгэ, Дархан-Уул зэрэг аймгуудад цэрэг татлага явагдахгүй. Мөн үүссэн нөхцөл байдалтай холбоотойгоор “Оюутан цэрэг” хөтөлбөрийг энэ жил хэрэгжүүлэхгүй. Сургууль, цэцэрлэг, их дээд сургуулийн хичээлийг есдүгээр сарын 1-нийг хүртэл хойшлуулах ажлыг энэ удаад яриагүй. Энэ асуудлыг БСШУСЯ-наас эхлээд ирүүлэх байх.
Маргааш эдийн засгийн багц арга хэмжээтэй холбоотой хууль батлагдана. Үүнтэй холбоотойгоор хувийн сургуулиудын төлбөрийг буцаах эсэхийг шийднэ. Боловсролын яамны зүгээс энэ жилийн төлбөрийг ирэх жил шилжүүлэх санал гаргасан байна. Бэлтгэл болон техникийн ажил дуусаагүй байгаа тул хөл хориог сунгах асуудлыг авч хэлэлцээгүй. Нэг зүйлийг хэлэхэд, хүүхдүүд улирахгүй” гэлээ.