УИХ-ын гишүүн Б.Батзориг УИХ-ын гишүүний бүрэн эрхээс чөлөөлөгдөх хүсэлтээ энэ сарын 3-нд буюу өнгөрсөн Баасан гаригт УИХ-ын дарга Г.Занданшатарт хүргүүлжээ.
Тэрбээр, энэ тухайгаа фэйсбүүк хуудастаа “Гишүүний бүрэн эрхээс чөлөөлөгдөх хүсэлтээ УИХ-ын даргад гаргалаа. Миний бие өнөөдрөөс эхлээд улстөрөөс ангид байж хариуцлагаа хүлээнэ. Болж өнгөрсөн үйл явдалд тайлбар хэлэх цаг хугацаа өнөөдөр биш. Хэзээ нэгэн цагт цээжээ онгойтол ярих өдөр ирэх бизээ. Цаг хугацаа бүх юмны хэмжүүр болох байхаа. Өөрийгөө өмгөөлөх, тайлбар тавих сэтгэл алга. Өнөөдөр хэлэх ганцхан үг минь УУЧЛААРАЙ” хэмээн бичжээ. Түүнийг бүрэн эрхээс чөлөөлөх асуудлыг 48 цагийн дотор Халдашгүй байдлын дэд хороогоор хэлэлцэх бөгөөд халдашгүй байдлын дэд хороог Ц.Нямдорж ахалж, Ө.Энхтүвшин, Н.Энхболд, Ч.Улаан, Д.Лүндээжанцан нарт багтдаг юм.