“Монголын нэгдсэн нягтлан бодогчдын нийгэмлэг” НӨАТ-ын буцаал олголтын 2 хувийг 5 хувь болгон нэмэгдүүлэх санаачлагыг дэмжиж байна.
НӨАТ нь татвар мэт үйлдэлтэй боловч угтаа татвар бол биш юм. Учир нь санхүүгийн тайланд НӨАТ-ыг татварын зардлаар бус өглөг, авлагын зарчмаар бүртгэдэг.
Нягтлан бодогчид бид НӨАТ-ын бүртгэл далд эдийн засгийг ил болгох, шударга татварын тогтолцоог бүрдүүлэхэд хамгийн чухал гэдгийг мэргэжлийн үүднээс нотлож чадна.
НӨАТ-ын буцаан олголтын хувийг нэмэгдүүлснээр иргэд и-баримтаа бүртгүүлэх нь нэмэгдэж, төр иргэдийнхээ хэрэглээг бэлэн тоон мэдээлэлд үндэслэн бүртгэж, оновчтой бодлого, шийдвэр гаргахад энэ нь чухал баримт болно. Мөн хяналтаа алдсан авлигын сүлжээг илрүүлж чадна. Өнөөдрийн “ногоон автобусны хэрэг”, олон жил барьж буй Дарханы зам, “Авилга” хороолол зэрэг луйвруудын хэрэг дахин гарах ёсгүй. Тиймээс авлига, луйврын хэргийг гаргахгүй байх хяналтыг НӨАТ-ын оновчтой бодлогоор хянаж болно.
Сангийн яам, нэр бүхий албан тушаалтнууд НӨАТ-ын буцаан олголтыг нэмэгдүүлэх иргэдийн санаачлагыг эсэргүүцэж байгаад харамсаж байна.
НӨАТ-ын үндсэн зорилгыг бодитоор хэрэгжүүлж, иргэдийнхээ эрх ашиг, улс орныхоо эдийн засгийн хөгжлийг дэмжих санаачлага бодит ажил хэрэг болно гэдэгт итгэж байна.
Монголын нэгдсэн нягтлан бодогчдын нийгэмлэгийн төлөөлөн удирдах зөвлөлийн дарга бөгөөд ерөнхийлөгч Ж.Онон