Сүргийн дархлаа, сүүтэй цай уугаад л ковидыг эмчилчихнэ гэж хэнэггүйтэж явсан монголчуудад тийм биш болохыг өвчилсөн, туссан хүмүүс сануулах болсон. Өнгөрсөн 24 цагийн хугацаанд covid-19-өөр нийтдээ зургаан хүн нас баржээ. Тэд 34-76 насны хүмүүс байжээ. ЭМЯ-наас цаашид нас баралт улам нэмэгдэхийг анхааруулсан. Эрдэмтдийн тооцоолсноор 28 хоногийг хатуу хөл хорио тогтоохгүй бол гэрээ нас барах хүмүүсийн тоо нэмэгдэхийг сануулсаар. ЭМЯ-ны хэвлэлийн төлөөлөгч Б.Ууганбаяр хэлэхдээ “Өнгөрсөн 24 цагийн хугацаанд зургаан хүн нас барсан харамсалтай мэдээлэл байна.
Одоогоор коронавируст халдварын шалтгаанаар 37 хүн нас бараад байна.
Нас барсан хүмүүсийн хувьд,
- Гуравдугаар сарын 15-нд онош нь батлагдсан 58 настай эрэгтэй,
- Дөрөвдүгээр сарын 6-нд онош нь батлагдсан 49 настай эрэгтэй,
- Дөрөвдүгээр сарын 7-нд онош нь батлагдсан 76 настай эмэгтэй,
- Дөрөвдүгээр сарын 12-нд онош нь батлагдсан 64 настай эмэгтэй,
- Дөрөвдүгээр сарын 12-нд онош нь батлагдсан 62 настай эрэгтэй,
- Дөрөвдүгээр сарын 13-нд онош нь батлагдсан 34 настай эрэгтэй коронавируст халдварын нэн хүнд хэлбэрээр нас барлаа. Дээрх хүмүүсийн зарим нь ХӨСҮТ болон Цэргийн төв эмнэлэг, Сүхбаатар аймгийн нэгдсэн эмнэлэгт хэвтэн эмчлүүлж байсан” гэв.