Монгол Улсын Засгийн газраас гадаадаас эх орондоо яаралтай ирэх хүсэлтэй байгаагаа ЭСЯ-аар дамжуулан илэрхийлэх болсон. Тиймээс Улсын онцгой комисс энэ сарын 10 өдрийн хуралдаанаар Япон, Солонгос болон Европын орнуудаас эх орондоо яаралтай буцах шаардлагатай жирэмсэн, хөгжлийн бэрхшээлтэй, бага насны хүүхэдтэй, өндөр настай монгол иргэдээ тусгай үүргийн онгоцоор авчрах шийдвэрийг гаргасан. Тодруулбал, БНСУ, Япон, Европын болон бусад улсад байгаа, хүндэтгэн үзэх шалтгаантай иргэдээ ойрын хугацаанд Москва, Истанбул хотоор дамжуулан “МИАТ” компанийн онгоцоор авчрах юм. БНСУ-аас 300, Япон-оос 100 хүн, бусад улс орнуудаас нийлээд 1000 гаруй иргэнийг дөрвөн удаагийн чартер нислэгээр авчрах аж. БНСУ-аас ирэх иргэдийн бүртгэл өчигдрөөс эхэлж, өнөөдөр /2020.03.13/ дуусах бол Японоос ирэх иргэдийн бүртгэл өнөөдрөөс эхэлж байгаа юм. Эх орондоо ирэх хүсэлт гаргасан иргэдийн тухайн орондоо өгөх шинжилгээнд зориулж, Засгийн газраас 320 сая төгрөгийг зарцуулахаар болсон байна.
БНСУ-аас яаралтай нутаг буцах хүсэлтэй иргэдийг авахаар ажиллаж байгаатай холбогдуулан Улсын онцгой комиссын Шуурхай штабаас гаргасан шийдвэрийн дагуу, хүлээн авах бэлтгэл ажлын хүрээнд иргэдэд дараах мэдээллийг хүргүүлж байна.
Үүнд:
БНСУ-аас яаралтай нутаг буцах хүсэлтэй иргэдийг тусгай нислэгээр эх орондоо авч ирэхээр болсонтой холбогдуулан Улсын онцгой комиссын Шуурхай штабаас гаргасан шийдвэрийн дагуу, бэлтгэл ажлын хүрээнд иргэдэд дараах мэдээллийг хүргүүлж байна.
- Тусгай нислэгээр эх орондоо ирэх хүсэлт гаргасан иргэд БНСУ-даа коронавируст халдварын шинжилгээнд заавал орсон байх шаардлагатай.
- Иргэдийг 14 хоног тусгаарлах байр, хоолны зардал хоногийн 50000 төгрөг буюу нийт 700000 төгрөг,
Дотоод хэргийн их сургуулийн оюутны байранд /цэргийн хуарангийн зохион байгуулалттай байр/ тусгаарлагдах бол 40000 төгрөг буюу нийт 560000 төгрөг. 0-5 настай хүүхэд төлбөргүй, 6-18 настай хүүхэд хоногийн 30000 төгрөг буюу нийт 420000 төгрөгийн төлбөр төлнө. Дээрх төлбөрийг БНСУ-аас ирэх иргэний ар гэрийнхэн нь Монголд, Онцгой байдлын ерөнхий газрын /ХААН БАНК 5084538375/ дансанд урьдчилан шилжүүлж, төлбөрийг бүрэн барагдуулсны дараа онгоцны суудлыг баталгаажуулна.
Төлбөр хийхдээ тухайн иргэний ОВОГ, НЭР, РЕГИСТРИЙН ДУГААР болон БАЙРНЫ ТӨЛБӨР гэдгийг заавал тодорхой бичихийг анхаарна уу.
Төлбөр хийгээгүй тохиолдолд бүртгэлээс хасч, төлбөрөө төлсөн дараагийн иргэнийг онгоцонд суулгана.
- Сөүлээс эхний нислэгээр ирэх бүх зорчигчийг Дотоод хэргийн их сургуулийн оюутны байранд /цэргийн хуарангийн зохион байгуулалттай байр/ тусгаарлана. Цагаан хэрэглэл, ариун цэврийн хэрэгсэл болон ойр зуурын хэрэглээний эд зүйлсийг Улаанбаатарт байгаа ар гэр нь урьдчилан бэлтгэж, нислэгээс өмнө дээрх байранд хүргэж өгсөн байна.
- Нийт зорчигчийн ачааг нисэх буудлаас ар гэрийнхэн нь ирж авна. Тухайн зорчигч зөвхөн гар тээштэйгээ тусгаарлах байранд шууд очно.
- Эрүүл мэндийн хүндэтгэн үзэх шалтгаантай иргэдийн өвчний талаарх мэдээлэл, тухайн иргэний Монголд байгаа ар гэртэй холбоо барих мэдээллийг ЭСЯ–наас 2020 оны 3 дугаар сарын 13-ны өдрийн дотор Улсын онцгой комиссын шуурхай штабт ирүүлнэ.
- Тусгай нислэгээр нутаг буцах иргэд эрүүл мэндийн асуумжийг санаатайгаар худал бөглөх, халдварт өвчтэйгөө нуух, улмаар бусдад халдаасан тохиолдолд Монгол Улсын Эрүүгийн хуулийн 15.6 дугаар зүйлд заасан “Бусдын амь насанд аюул учруулж болзошгүй халдварт өвчин, дархлал хомсдолын вирус халдаах” гэсэн үндэслэлээр 1-5 жил хүртэл хугацаагаар хорих ял шийтгэх заалттайг анхаарна уу.
- Коронавирусын халдвар дэлхийн 100 гаруй улсад тархсантай холбоотойгоор Дэлхийн эрүүл мэндийн байгууллагаас цар тахал хэмээн зарласан. Монгол Улс өндөржүүлсэн бэлэн байдалд шилжин ажиллаж байгаа тул Улсын онцгой комиссын шуурхай штабаас гаргасан шийдвэр, шаардлагуудыг Монгол Улсын иргэд хатуу мөрдөж биелүүлэх шаардлагатай.