Сайжруулсан шахмал түлшний хомсдолын асуудлаар албаныхан өнөөдөр /2021.10.05/ түлш борлуулалтын цэгүүдэд ажиллажээ. Энэ ажилд Эрчим хүчний сайд Н.Тавинбэх, “Тавантолгой түлш” компанийн захирал М.Ганбаатар, нийслэлийн Засаг даргын Агаар, орчны бохирдлыг асуудал хариуцсан төслүүдийн удирдагч З.Төмөртөмөө, “Тавантолгой түлш” компанийн төлөөлөн удирдах зөвлөлийн дарга Ж.Батбаясгалан нар оролцож, нөхцөл байдалтай танилцсан байна.
Энэ үеэр “Тавантолгой түлш” компанийн захирал М.Ганбаатар хэлэхдээ “Энэ хямдралыг тодорхой хугацаанд зогсоохоос өөр аргагүй. Хямдрал байгаа цагт сайжруулсан түлшний оочер дугаар тасрахгүй. Түлшний цэгийн тоог 1000, 2000, 3000 цэг нэмээд ч тасрахгүй. Энэ бүхэн хямдралаас л болж байна. Түлшний үнийг нэмэх хэрэгтэй. Картын хяналтыг хэн, хаана, хэзээ, яаж хянаж байгаа юм бэ” гэв.
Хүйтний ам наашилж, хөрсөн дээрээ цочир хүйтрэхдээ зэрэгцээд гэр хорооллынхон гал алдаж эхэллээ. “Тавантолгой түлш” компани есдүгээр сарын 27-ноос борлуулалтын 40 цэгээр шахмал түлш борлуулж эхэлсэн нь иргэдийг бухимдлыг төрүүлсэн юм.