“Google”-ийн гүйцэтгэх захирал С.Пичай Европ тивийн дата төвүүдээ өргөжүүлэхийн тулд ойрын хоёр жилийн хугацаанд 3 тэрбум (3.3 тэрбум доллар) еврогийн нэмэлт хөрөнгө оруулалт хийхээр болсноо Финланд улсад хийсэн мэдэгдэлдээ дурджээ.
Хөрөнгө оруулалтын төлөвлөгөөнд Финландын Хамина хотын дата төвдөө 600 сая еврогийн нэмэлт хөрөнгө оруулалт тусгаснаар тус байгууламжид оруулсан нийт хөрөнгө оруулалтын хэмжээ 2 тэрбум еврод хүрнэ. Хамтарсан хэвлэлийн бага хурлын үеэр Финландын ерөнхий сайд Антти Ринне “Энэ бол Финландчуудын хувьд гайхалтай мэдээ” гэж цохон тэмдэглэжээ.
“Google”-ийн Хамина хотод байгуулсан тус дата төв нь хуучин цаас боловсруулдаг үйлдвэрт шинэчлэл хийж, 800 сая еврогийн хөрөнгө оруулалтаар боссон түүхтэй. Тэгвэл ирэх 5 дугаар сард тус байгууламжид дахин шинэ дата төв байгуулахад 600 сая еврогийн хөрөнгө оруулалт хийнэ гэдгээ ийнхүү мэдэгдлээ.
Тус байгууламжийг “Google” компани 2009 онд “Stora Enso” компаниас худалдан авсан бөгөөд ОХУ-ын хилээс холгүй оршдог. Мөн хөргөлтийн системдээ Финландын булангаас далайн усыг татан ашиглаж, эрчим хүчээ хэмнэдэг давуу талтай байршил юм. Нидерланд, Ирланд, Бельги улсад “google”-ийн бусад евро бүсийн дата төвүүд байрладаг.