Токио-Улаанбаатар чиглэлийн тусгай үүргийн онгоцоор Монголд ирж ХӨСҮТ-д тусгаарлагдсан Ерөнхийлөгчийн зөвлөх, Асашёорюү Д.Дагвадорж тусгаарласан газраа голж, “Би тэнд байрлах ёстой, тусгай машинаар явна” гэхчлэн хамгаалалтынханд хүндрэл учруулсан гэх мэдээлэл өнгөрсөн Баасан гаригт олон нийтийн сүлжээнд цацагдсан. Харин энэ талаараа тэрбээр “Би карантинаа барина! Харин нэг асуудал байна! ХӨСҮТ-ийг ч голсон зүйл байхгүй! Улаан бурхны үед аппарат болон агаар шүүгч тусламж өгч байсан! Би хэвтрээ голох тийм хүн биш! Асуудал юундаа байсан бэ гэвэл Японд байсан бид нар Токиогийн өнөөдрийн нислэгт бусад улсаас дамжиж ирсэн 57 хүнтэй цугтаа баймааргүй байна аа гэж хэлсэн! Хүнд хэцүү үе, дэлхий тэр чигээрээ хэцүү байгаа энэ үед ийм өндөр эрсдэл үүрүүлэхийг гэр бүлдээ хүсэхгүй! Хэн ч хүсэхгүй! Асуудал энэ!” хэмээн бухимдаж нүүр номын хуудсаараа дамжуулан МАН-ын дарга нар хүүхдээ хар машинаар зөөлөө хэмээн хуурай агсам тавьсан.
Сошиал уураа “сад тавьсан” түүнийг Ерөнхийлөгчөөс банга хүртсэн үү эсвэл төрсөн ах Д.Сумъяабазартаа загнуулав уу, эсвэл хэлсэн үг болгондоо ороогдохоосоо айсан уу, ямартаа ч таг чиг болжээ. Тэрбээр ХӨСҮТ-д 21 хоног тусгаарлагдах юм.